تیری آغوش میں سمانا ہے

غم زمانے کا بھول جانا ہے 

آپ کو ہم نے یاد رکھنا ہے 

آپ نے ہم کو بھول جانا ہے 

حسن کا ایک ہی وطیرہ ہے 

روٹھ جانا ہے دل دکھانا ہے 

کب تلک مبتلائے عشق رہوں 

میں نے پیسہ بھی تو کمانا ہے

کس طرح چھوڑ دوں سخن آصف 

شعر شاعر کا آب و دانہ ہے

یہ تری چشمِ نیم باز آصف

کیسا عمدہ شراب خانہ ہے

محمد آصف میو

 پیار کے پھول مرے دل میں کھلانے والا

مجھ  کو پیارا ہے مرا ساتھ نبھانے والا

واسطے ، ناطے،تعلق کو نہیں دیکھےگا

چھوڑ جائے گا میاں چھوڑ کے جانے والا

کسی کےعشق میں برباد نہیں ہو سکتا 

میں اکیلا ہوں مرے گھرمیں کمانے والا

اب کسی اور کو محبوب بلاتا ہوگا

دھجیاں میری محبت کی اڑانے والا

جس کو سونپی ہوئی ہے دل کی حکومت میں نے

جانتا ہوں وہ نہیں ساتھ نبھانے والا

محمد آصف میو

تیرا ٹوٹا غرور دیکھیں گے

انشاء اللہ ضرور دیکھیں گے

باقی رہتا ہے آخرش کب تک 

تیرے چہرے کا نور، دیکھیں گے

اور وہ دن بھی آئے گا جس دن

تیرا روضہ حضورﷺ دیکھیں گے

میرے اللہ نے اگر چاہا

ہم بھی جنت میں حور دیکھیں گے 

وہ تو لڑکا ہے خیر ہے اس کی

سب تمہارا قصور دیکھیں گے

محمد آصف میئو

 زخم دل پر مرے لگایا گیا 

تم کو مجھ سے جدا بتایا گیا 

آخری بار اس کو دیکھا گیا 

آخری بار مسکرایا گیا 

میری میت پہ خاک ڈالی گئی

تیری شادی پہ گیت گایا گیا 

پھر مرا پیار مجھ سے چھینا گیا 

پھر مرا صبر آزمایا گیا

اس کے بستے میں پھول رکھے گئے 

اس کی کاپی پہ دل بنایا گیا 

جب محبت میں بے وفائی ملی

تب محبت سے باز آیا گیا

محمد آصف میئو

 میں ہوں تیری کمی ہے کمرے میں 

کس قدر بے بسی ہے کمرے میں 

دل کی دھڑکن سے کان پھٹتے ہیں

اس قدر خامشی ہے کمرے میں 

تیرے جانے کے بعد مایوسی 

ہر سُو بکھری پڑی ہے کمرے میں 

اس لئے چھوڑتا نہیں اس کو 

تیری خوشبو بسی ہے کمرے میں

 کل اداسی تھی غم تھا رسی تھی 

آج پھانسی لگی ہے کمرے میں

محمد آصف میئو

 بدنامیوں کا روگ مرے حصے ڈال کر

کیا مل گیا تمہیں مری عزت اچھال کر

ہم لوگ ہیں کہ سجنے سنورنے کی عمر میں 

بیٹھے ہوئے ہیں عاشقی کا روگ پال کر

اچھا بتاؤ ملک کو کس نے تباہ کیا

یہ تو سبھی کو آتا ہے مشکل سوال کر

اگلے جہان رب کو دکھانے کے واسطے 

رکھا ہوا ہے تیرا ہر اک دکھ سنبھال کر 

جو اس جہاں نہ مل سکے ان کو وہاں ملا 

اے خالقِ جہان  ہمارا خیال کر

 ہمارے سامنے لفظوں کی کچھ وَقعَت نہیں آصف 

ہمیں جذبوں کو پڑھنے کا ہنر اچھے سے آتا ہے 

محمد آصف میئو 

 میں شب بھر تھا کس کرب میں مبتلا 

مری جان تجھ کو نہیں ہے پتہ

ترے بن میں کیسے رہوں گا بھلا 

تو آتی نہیں ہے تو آلے قضا 

مجھے چھوڑ کر تو کہاں چل دیا 

محبت کا میری صلہ یہ دیا 

میں جب یاد کرتا ہوں اپنی وفا 

مجھے یاد آتی ہے تیری جفا

تو جس کو بھی رکھے گا دل میں مگر 

تجھے ہی رکھوں گا میں دل میں سدا

 محمد آصف میئو 

 ایسی بھی کیا مصیبتیں ٹوٹی ہیں آپ پر

صحرا میں آ بسے ہو جو گھر بار چھوڑ کر

چاہیں تو کاٹ دیجیے حاضر ہے میرا سر

ایسے تو چھوڑ کر نہیں جائیں حضور پر

ہم جل رہے ہیں ہجر کے صحرا میں یا خدا 

اب تو ہمیں بھی وصل کی بارش نصیب کر 

بیٹھے ہو ڈاکٹر تو کرو میرا کچھ علاج

تیرہ برس سے نیند نہیں آتی رات بھر 

کہنے لگے وہ میرے کچھ اشعار دیکھ کر 

آصف غزل کی دیوی مہر باں ہے آپ پر

محمد آصف میؤ

 یہ تعلق تمام مت کیجو

میرا جینا حرام مت کیجو

جس سے اجداد کی ہو رسوائی 

ایسا کوئی بھی کام مت کیجو

اے غمِ جان ایک منت ہے 

میرے دل میں قیام مت کیجو

تیرا جامِ نگاہ کافی ہے

رقص کا اہتمام مت کیجو

بیٹھے رہیو ہمارے پہلو میں 

چاہے ہم سے کلام مت کیجو

شاعری کیجیو مگر آصف

میری آنکھوں کا نام مت کیجو

محمد آصف میؤ

 ہم کو ملتان سے محبت ہے 

اور دل جان سے محبت ہے

ہر اس انسان سے محبت ہے 

جس کو نقصان سے محبت ہے

ہم کو عمران سے محبت ہے 

اپنے کپتان سے محبت ہے

تم کو ہوگی جہاں کی دولت سے

ہم کو انسان سے محبت ہے

آپ لاہور سے کریں لیکن 

ہم کو ملتان سے محبت ہے 

ہاں نہیں ہے وصال سے لیکن 

دردِ ہجران سے محبت ہے

جو محبت کی سوجھ رکھتا ہو

ایسے دھنوان سے محبت ہے

محمد آصف میؤ

 دل کی شمع بجھا رہا ہوں میں 

آپ سے دور جا رہا ہوں میں

ہجر تیرا منا رہا ہوں میں 

عمر اپنی گھٹا رہا ہوں میں

پیار کے نغمے گا رہا ہوں میں 

نیند میں بڑبڑا رہا ہوں میں 

اپنے دل کی ہتھیلیوں پر سے 

نام تیرا مٹا رہا ہوں میں

پوچھتے ہیں وہ حالِ دل مجھ سے 

اور غزلیں سنا رہا ہوں میں 

اپنے گاؤں کے سارے بچوں کو 

شعر کہنا سکھا رہا ہوں میں

میرے دل میں سما رہا ہے تو 

تیرے دل میں سما رہا ہوں میں

اس محبت سے سب بچو یارو 

پھر نہ کہنا بتا رہا ہوں میں  

رات کیا دیکھتا ہوں سپنے میں 

تجھ کو سینے لگا رہا ہوں میں

اپنی دنیا سے تیری دنیا تک 

ایک رستہ بنا رہا ہوں میں

دے رہا ہوں تسلیاں دل کو 

خود کو پاگل بنا رہا ہوں میں  

اب تو آ جاؤ مجھ سے ملنے کو 

خاک ہونے کو جا رہا ہوں میں 

محمد آصف میئو

 حسن کی اک مثال ہے یارو 

وہ سراپا جمال ہے یارو 

وہ کرشمہ ہے ایک، قدرت کا 

میرے رب کا کمال ہے یارو 

پہلے وہ صرف یاد آتی تھی

اب تو جینا محال ہے یارو

ہم سے اجڑے، غریب لوگوں کا

کون پرسانِ حال ہے یارو

میرے جیسے بھی شعر کہنے لگے 

شاعری کا زوال ہے یارو

محمد آصف میئو

 سب پوچھتے رہتے ہیں وہ کیسی ہے کہاں ہے

بس اتنا بتا دوں میں جہاں ہوں وہ وہاں ہے

سُکھ چین ہے دُکھ درد ہے دولت ہے مکاں ہے

لاہور کی اک لڑکی مجھے سارا جہاں ہے

یہ زخم ہے کیسا کہ جو بھرتا ہی نہیں ہے

ہم ہو چکے بوڑھے یہ مگر اب بھی جواں ہے

ہائے وہ مرا دوست مری جان مرا پیار

جس سمت بھی دیکھیں ہیں یہی آہ و فغاں ہے

جی جان سے چاہو جسے وہ ملتا نہیں ہے

مجنوں کے زمانے سے یہی رسم رواں ہے

یعنی کہ تو کرتا ہے گلے پیٹھ کے پیچھے 

یعنی کہ ترے منہ میں منافق کی زباں ہے

محمد آصف میؤ

 وہ ہمیں چھوڑ کر چل دیا دوستا

ہم پکارا کیے دوستا دوستا 

مدتوں بعد تو ہے ملا دوستا

کچھ مری سن کچھ اپنی سنا دوستا

تو نے جیون نیا اک شروع کر لیا 

میں وہیں پر رکا رہ گیا دوستا

تیرے جانے سے جیون یہ بے نور ہے 

میرے جیون میں پھر لوٹ آ دوستا

مانتا ہوں میں تیرا گنہ گار ہوں

تو جو چاہے مجھے دے سزا دوستا

محمد آصف میؤ

 اُف وہ جس کی دلہن بنی ہوگی 

اُس کی قسمت بدل گئی ہوگی 

روٹھ کر مجھ سے وہ شفق اندام 

جَون کے شعر پڑھ رہی ہوگی 

میں بھی اب خون تُھوکتا ہوں صنم 

آپ کو جان کر خوشی ہوگی

پوچھتا ہوں میں خود سے یہ اکثر

کیا ترے بِن بھی زندگی ہوگی 

وہ مری "ایک لڑکی" والی نظم 

ہو نہ ہو اُس نے بھی پڑھی ہوگی 

جتنا لکھتا ہوں اس کے بارے میں 

وہ تو بدنام ہو گئی ہوگی 

کامیابی مری, عزیزوں کی 

لازمی آنکھ میں چبھی ہوگی 

سُن کے خبریں مری ترقی کی 

رشتہ داروں کی جل گئی ہوگی

محمد آصف میؤ

 

بنا کے آشیاں آندھی کا انتظار کروں

تو چاہتا ہے کہ میں عشق اختیار کروں

 

میں اُس کے واسطے آنکھوں کو اشک بار کروں

وہ شہر بانو نہیں ہے جو اُس سے پیار کروں

 

ملا ہے اُس سے ملاقات کا یہی نسخہ

کہ نیند اوڑھ لوں خوابوں میں انتظار کروں

 

خدا نے خوبیاں دی ہیں تو اس کا کیا مطلب

کہ میں معصوم حسیناؤں کا شکار کروں

 

تُو چاہتا ہے میں ماتم کروں جدائی کا

تُو چاہتا ہے میں دامن کو تار تار کروں

 

نہہں ملا جو وہ قسمت میں ہی نہیں ہوگا

اب اتنی بات کو کیا ذہن پہ سوار کروں

 

محمد آصف میؤ

اشک آنکھوں میں نہ لاؤ لڑکی

ہم پہ یہ ظلم نہ ڈھاؤ لڑکی

 

سُرمہ آنکھوں میں لگاؤ لڑکی

ہم کو دیوانہ بناؤ لڑکی

 

ہم کو سینے سے لگاؤ لڑکی

اس زمانے کو جلاؤ لڑکی

 

زلف لہرا کے نہ آؤ لڑکی

یہ قیامت نہ اُٹھاؤ لڑکی

 

پھر سُخن کا ہے دل میں شوق اٹھا

پھر مجھے چھوڑ کے جاؤ لڑکی

 

دیکھ کر کر رہی ہو ان دیکھا

ہم کو ایسے نہ ستاؤ لڑکی

 

چھوڑ جاؤ مگر محبت کا

یوں تماشہ نہ بناؤ لڑکی

 

ملنے آنا اگر نہیں ممکن

خواب میں ہی چلی آؤ لڑکی

 

دوستی کرتا ہوں مگر پہلے

جَون کا شعر سناؤ لڑکی

 

سب سمجھتا ہوں نومولود نہیں

مجھکو پاگل نہ بناؤ لڑکی

 

میں ہوں شاطر کھلاڑی لفظوں کا

میری باتوں میں نہ آؤ لڑکی

 

محمد آصف میؤ

 

ہم جل رہے ہیں ہجر کے صَحرا میں یا خدا

ہم کو بھی کبھی وصل کی بارش نصیب کر

 

محمد آصف میؤ

تیرے اوپری ہونٹ کا تِل لڑکی

میرا چھین کے لے گیا دل لڑکی

 

مجھے مار دے اپنی نظروں سے

خنجر نہ اٹھا قاتل لڑکی

 

میں بھنورا بن کر آؤں گا

تو پھول کی صورت کِھل لڑکی

 

میں دنیا سے لڑ جاؤں گا

تجھے کرنے کو حاصل لڑکی

 

تیرے تن کی پیاس بُجھا دوں گا

کسی روز اکیلے مِل لڑکی

 

میرا جیون گُھپ اندھیرا ہے

میرا جیون کر جِھلمِل لڑکی

 

تمہیں کیسے بُھلا دوں تم میری

نس نس میں ہو شامل لڑکی

 

کوئی شعر سناؤ آصف کا

اور لُوٹ لو یہ محفِل لڑکی

 

محمد آصف میؤ

  

ہم لے کے آ رہے ہیں وہ شاہکار دوستو

جس کا تھا آپ سب کو انتظار دوستو

 

اقرار کر رہے ہیں نہ انکار دوستو

وہ کر رہے ہیں ظلم لگاتار دوستو

 

چرچے ہیں کل جہان میں ان کے جمال کے

اک ہم ہی نہیں ان کے پرستار دوستو

 

کچھ بات ہے جو لگ گئے تالے زبان پر

ہم بھی کبھی تھے ماہرِ گُفتار دوستو

 

محفل میں سب کے سامنے سن کر وفا کا ذکر

اک شخص ہو رہا ہے شرمسار دوستو

 

جس کا تھا انتظار ہمیں چار برَس قبل

ہے آج بھی اسی کا انتظار دوستو

 

اس نفرتوں کے حبس زدہ معاشرے میں آج

ہے کون محبت کا طرف دار دوستو

 

نفرت کا نام تک نہ رہے گا جہان میں

ہوگا کبھی تو یہ بھی چمتکار دوستو

 

تو کیا ہوا واہ وائ اگر مل نہیں رہی

ہم شعر کہہ رہے ہیں دھواں دار دوستو

 

نفرت بھری ہوئ ہے ہمارے دماغ میں

اور دل ہے محبت کا طلب گار دوستو 

 

محمد آصف میؤ

 

 

دل کی کشتی کا ڈبونا نہیں دیکھا جاتا

ہم سے پگلی ترا رونا نہیں دیکھا جاتا

 

موئ دنیا بڑی حاسد ہے اس کمینی سے

آپ کا مجھ میں سمونا نہیں دیکھا جاتا

 

تیرا مرنا تو دیکھ سکتے ہیں مگر لڑکی

غیر کے گھر ترا ہونا نہیں دیکھا جاتا

 

باخدا دل مرا واپس مجھے دے دیجے اب

خالی سینے کا یہ کونا نہیں دیکھا جاتا

 

پہلے کہتے تھے تری موت دیکھ سکتے ہیں

اب ترا قبر میں سونا نہیں دیکھا جاتا

 

غمِ فراق بھی کچھ کم تو نہیں ہے لیکن

تنگئِ رزق کا ہونا نہیں دیکھا جاتا

 

محمد آصف میؤ

 نظم : محبت نہیں 

 ایک ذرہ برابر تمہارے لئے 

میرے دل میں اے لڑکی 

محبت نہیں

میں تو شاعر ہوں

غزلوں کا خالق ہوں میں 

مجھ کو بحر و قوافی سے فرصت نہیں 

مجھ کو تم سے محبت نہیں چاہئے

تم مجھے چاہتی ہو تو چاہتی رہو

تم دعاؤں میں مانگو مجھے رات دن 

تم مرے نام کے گیت گاتی رہو

ایک ذرہ برابر تمہارے لئے

میرے دل میں اے لڑکی 

محبت نہیں 

میں نے اُس کو بتایا

محبت نہیں

وہ مگر پھر بھی

مجھ پہ ہی مرتی رہی

جس کو میں نے ذرا سی توجہ نہ دی

وہ مرے واسطے ہی سنورتی رہی

ایک دن یوں ہوا

اُس نے مجھ سے کہا

پیار سے دیکھ لو

ورنہ مر جاؤں گی

میں مَروں گی تو تیری ہتھیلی پہ بھی

زندگی بھر کا پچھتاوا دَھر جاؤں گی

میں نے اس کو نہ سنجیدگی سے لیا 

ڈانٹ کر اس کو میں 

اپنے گھر آ گیا 

اس کی باتوں کو میں

اَن سُنا کر گیا 

اس کی چاہت کو

 دُھتکار کر آگیا

میں نے سوچا

کہ یوں کوئی مرتا ہے کیا

موت دیکھے گی تو

خود ہی ڈر جائے گی

کونسا میں زلیخا کا یوسف ہوں کہ

میری چاہت میں جاں سے گُزر جائے گی

دن ڈھلے آ خبر دی کسی دوست نے

وہ جو کہتی تھی

سچ کر گئی آج وہ

تیری غزلیں مُبارک تجھے دوستا

تجھ پہ مرتی تھی جو

مر گئی آج وہ

تجھ پہ مرتی تھی جو

مر گئی آج وہ...

 

محمد آصف میؤ

اپنی جاگیر گنوا دی ہم نے

تیری تصویر جلا دی ہم نے

شمع ءِ عشق بجھا دی ہم نے

تیری ہر بات بُھلا دی ہم نے

مطلبِ حسن مو سے پوچھا گیا

تیری تصویر بنا دی ہم نے

ہاتھ جس نے بھی رکھا کاندھے پر 

دل کی روداد سنا دی ہم نے

پر یہ افسوس رہے گا آصف

کیوں تمہیں دل میں جگہ دی ہم نے

محمد آصف میؤ

 دِل چھن گیا ہے ، چھِن گیا دِل کا سُرُور بھی 

وہ کیا گیا کہ لے گیا آنکھوں کا نُور بھی ۔۔۔

وہ پَرلے شہر ہو کے بھی دِل میں مکین ہے 

وہ پاس بھی رہتا ہے مرے اور دُور بھی ۔۔۔

اِتراتا ہے وہ اور ہمیں دیکھتا نہیں ۔۔۔۔۔۔۔

اِک تو سِتم کرے ہے پھر اُس پہ غُرُور بھی 

بس دردِ دل سنائیے اور داد پائیے ۔۔۔۔۔۔

یہ کیا فضول چیزیں ہیں وزن و بحُور بھی 

پیتے ہیں اس جہاں میں بھی جی بھر شراب اور 

کرتے ہیں آرزوئے شرابِ طَہُور بھی ۔۔۔۔۔۔

آصف لبوں سے اُس کے ہنسی پھوٹتی ہے اور 

ماتھے پہ بنی ہوتی ہیں اُس کے سُطُور بھی

محمد آصف میؤ

 سبھی دعاؤں کا رد ہونا بے اثر جانا 

غضب تکلیف ہے یہ خواہشوں کا مر جانا

تم کسی اور کی ہو جاؤگی تو دکھ ہوگا 

تم کسی اور کی نہ ہونا بھلے مر جانا

میں تمہیں جاتے ہوئے دیکھ نہیں پاؤں گا 

تم مجھے چھوڑ کے جاؤ تو دوڑ کر جانا

ہائے وہ وقت کہ جب عشق پر یقیں نہ تھا 

پھر اچانک تمہاری کھڑکی پر نظر جانا

میں چاہتا ہوں کہ کھو کر تمہیں پچھتاؤں بہت  

تمہیں میں چھوڑ دوں تو اور بھی سنور جانا

محمد آصف میؤ

 ایک ذرہ برابر تمہارے لئے 

میرے دل میں اے لڑکی 

محبت نہیں

میں تو شاعر ہوں

غزلوں کا خالق ہوں میں 

مجھ کو بحر و قوافی سے فرصت نہیں 

مجھ  کو تم سے محبت نہیں چاہئے

تم مجھے چاہتی ہو تو چاہتی رہو

تم دعاؤں میں مانگو مجھے رات دن 

تم مرے نام کے گیت گاتی رہو

ایک ذرہ برابر تمہارے لئے

میرے دل میں اے لڑکی 

محبت نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔

محمد آصف میؤ

 واں غیر سے منسوب ہوا وہ ، یہاں مرا 

شوقِ وصالِ یار بھی مٹی میں مل گیا

محمد آصف میؤ

 چاہئیے ہے ترا سہارا مجھے 

آ گلے سے لگا خدارا مجھے

میں ترے ہجر سے مرا ہوں کیا 

یا تری بے رخی نے مارا مجھے 

سب کے سب تھے مرے خلاف یہاں 

سب سے کرنا پڑا کنارا مجھے 

میرے مرنے کی اک وجہ یہ تھی

زندگی نے نہیں پکارا مجھے 

آپ کا ہجر تو بہانہ تھا 

میری حساسیت نے مارا مجھے 

محمد آصف میؤ

 خوشی سے آشنا ، بیگانہءِ الم کردے 

اے ربِّ کُل مری افسُردَگی کو کم کر دے

وہ میرے دل سے نکل جائے ایسا وِرد بتا 

وہ مجھ کو یاد نہ آئے کچھ ایسا دَم کر دے

دے مجھ کو ایسا ہُنَر میں بھی حمد و نعت کہوں 

مجھے دے فہمِ سخن ، صاحِبِ قَلَم کر دے

ڈال کر خوشیاں محبت کی میری جھولی میں 

تو میرے دل سے دفع سارے رنج و غم کر دے

محمد آصف میؤ

 پوچھ رہے ہیں آج ہمارے خوش ہونے کا یار سبب 

آج اُن کا دیدار ہوا ہے اور تو کوئی بات نہیں 

کہنے کو تو اس کے بعد بھی سب کچھ ہے موجود یہاں

سب کچھ ہے موجود یہاں پر پہلے سے دن رات نہیں

محمد آصف میؤ

 مرا وجود انہیں بوجھ لگنے لگ گیا ہے

مرے بچے مرے مرنے کے انتظار میں ہیں

محمد آصف میؤ

نظم : فرصت

 کسی کو فرصت ہی کب ہے یارو

کہ کوئی ہم پہ نگاہ ڈالے 

کہ کوئی ہم کو ٹھہر کے دیکھے

 پلٹ کے دیکھے 

اور ان کی نظریں 

ہمارے جسموں میں ایسے اتریں

کہ جیسے شاعر پہ شعر اتریں 

کسی کو فرصت ہی کب ہے یارو 

ہماری جھوٹی ہنسی کے پیچھے

چھپی ہماری اداسی دیکھے

ہمارے کاندھے پہ ہاتھ رکھے 

ہمارے اندر کے دکھ کو سمجھے 

کسی کو فرصت ہی کب ہے کہ وہ 

مجھ ایسے لڑکے

کی خامشی کو آواز سمجھے 

مجھ ایسے پاگل کی شاعری کو

بھی راز سمجھے 

محمد آصف میؤ

نظم : وہ ایک لڑکی

 وہ ایک لڑکی کہ جسکی آنکھوں 

میں جگنوؤں سی چمک ہے یارو 

اُفق پہ بارش کے بعد پڑتی

 وہ سات رنگی دھنک ہے یارو 

ہمارے دل میں وہ ایک لڑکی

 گزشتہ سالوں سے بس رہی ہے

کہ یاد اس کی ہمارے جیون

 کو لمحے لمحے میں ڈس رہی ہے

وہ ایک لڑکی کے جسکی صورت

 کو میری آنکھیں ترس رہی ہیں

وہی تو ہے وہ کہ جس کے غم میں 

ہماری آنکھیں برس رہی ہیں

وہ ایک لڑکی جو میری خواہش

 ہے میری حسرت ہے میری چاہت 

وہ ایک لڑکی کہ جس کو دیکھے

 سے میرے دل کو ہے ملتی راحت

وہ ایک لڑکی کہ جس کو دیکھے سے

 میرے دل کو قرار آئے 

وہ ایک لڑکی کہ جس کے ہونے

 سے غم زمانے کا بھول جائے

وہ ایک لڑکی کہ شہرِ قائد میں

 جس کا گھر ہے 

وہ لڑکی مجھ کو

 جہان بھر سے عزیز تر ہے

وہ لڑکی مجھ کو

 جہان بھر سے عزیز تر ہے

محمد آصف میؤ

 پھر تری یاد آئی کسی بات پر 

پھر ترا ہجر سہنا پڑے گا مجھے 

پاس آؤ،  گلے سے لگو،  پیار دو 

یعنی یہ سب بھی کہنا پڑے گا مجھے

محمد آصف میؤ

 

سکونِ دل کی بربادی، میاں تم کو مبارک ہو

مرے معشوق سے شادی، میاں تم کو مبارک ہو

 

وہ تم کو باندھ کے رکھے گی پلُّو سے یہ لکھ رکھو

کہ آزادی سے آزادی ، میاں تم کو مبارک ہو

 

وہ پاگل ہے، جنونی ہے، وہ ٹینشن کی مریضہ ہے

سلیپنگ پِلز کی عادی، میاں تم کو مبارک ہو

 

وہ  ایسے جھوٹ گھڑتی ہے کہ شیطاں بھی پناہ مانگے

وہ مکّاروں کی پردادی، میاں تم کو مبارک ہو

 

ہمیں بھی مل ہی جائے گی کسی دہقان کی بیٹی

ولایت کی وہ شہزادی، میاں تم کو مبارک ہو

 

محمد آصف میؤ

خار آنے لگی خوشی سے مجھے

اب شکایت نہیں کسی سے مجھے

 

یوں تو چہرے پسند ہیں کافی

پر محبت ہے آپ ہی سے مجھے

 

تیری تصویر میرے بٹوے میں

باز رکھتی ہے خود کشی سے مجھے

 

میرے حجرے میں بلا لاؤ اسے

بات کرنی ہے چاندنی سے مجھے

 

تو محبت میں ہی نہ پڑ جائے

دیکھ نہ اتنی تندہی سے مجھے

 

بَن کے بیٹھی ہے غیر کی دُلہن

کر کے بیزار زندگی سے مجھے

 

اب اندھیرے پسند ہیں مجھ کو

خوف آتا ہے روشنی سے مجھے

 

تم نے کتنوں کے گھر اجاڑے ہیں

پوچھنا ہے یہ دل لگی سے مجھے

 

محمد آصف میؤ